'காமன்வெல்த்'  (Commonwealth) என்பது 54 சுதந்திர, இறையாண்மை வாய்ந்த  நாடுகளைக் கொண்ட ஒரு  தன்னார்வ கூட்டமைப்பாகும். காமன்வெல்த் முதன் முதலில் 1931-ஆம் ஆண்டு தோற்றுவிக்கப்பட்டது. அப்போது அது 'பிரிட்டிஷ் காமன்வெல்த்' என அழைக்கப்பட்டது. இங்கிலாந்து, கனடா, நியூஸிலாந்து, தென் ஆப்பிரிக்கா, the Irish Free State, Dominion of New Foundland  ஆகியவை முதல் உறுப்பு நாடுகளாகும். 1949-ஆம் ஆண்டு  செய்யப்பட்ட இலண்டன் பிரகடனத்தின்கீழ் புதிய காமன்வெல்த் கூட்டமைப்பு  நிறுவப்பட்டது. காமன்வெல்த் உறுப்பு நாடுகளில்  பெரும்பாலானவை முன்னாள் பிரிட்டிஷ் பேரரசின் காலனிகள் (குடியேற்ற நாடுகள்)  அல்லது அவற்றின் சார்பு நாடுகளாகும் (dependencies). இரண்டாவது எலிசபெத் அரசியார் இந்தக் கூட்டமைப்பின் தலைவராவார். இதன் தலைமையகம் இலண்டனில் அமைந்துள்ளது. பல்வேறு அரசியல், பொருளாதார, சமூகப் பின்புலன்களையுடைய  நாடுகளை உறுப்பினர்களாகக் கொண்ட இந்தக் கூட்டமைப்பு, சிங்கப்பூர் காமன்வெல்த் பிரகடனத்தில் (1971)குறிப்பிடப்பட்டுள்ள மக்களாட்சி மலர ஊக்குவித்தல், மனித உரிமைகளைப் பேணுதல், சட்டநீதி, தடையிலா வாணிகம்,  நல்லாட்சி, தனிமனித உரிமை,  பன்னாட்டு உறவுகள், உலக அமைதி ஆகிய விழுமங்கள் மற்றும்  நோக்கங்கள்   அடிப்படையில் தனது செயல்திட்டங்களையும் கூட்டங்களையும் நடத்தி வருகிறது. 

உறுப்பு நாடுகளில் மூன்று ஐரோப்பாவிலும், 13 வட, தென் அமெரிக்கா, கரீபியன் பகுதியிலும்,  19 ஆப்பிரிக்காவிலும், எட்டு ஆசியாவிலும், 11 ஓசானியாவிலும்  உள்ளன. இவற்றில் 16 நாடுகள் எலிசபெத் அரசியாரைத்  தங்கள் நாட்டின் தலைவராகக் கொண்டுள்ளன. ஐந்து நாடுகள் முடியாட்சி (மன்னராட்சி) நாடுகள் (புருணை, லெசோதோ, மலேசியா, சுவாஸிலண்ட்); மற்றவை குடியரசுகள்.  உலகின் பெரிய நாடுகளில் சிலவும், சிறிய, செல்வமிக்க, ஏழ்மை நாடுகளும் காமளவெல்த் கூட்டமைப்பில் உறுப்பியம் பெற்றுள்ளன. இந்தக் கூட்டமைப்பின்  உறுப்பு நாடுகளில் எல்லா இனங்களையும் சமயங்களையும் சார்ந்த  ஏறத்தாழ 2 பில்லியன் குடிமக்கள் வாழ்கின்றனர். அவர்களுள் 50 விழுக்காட்டிற்கு மேற்பட்டவர்கள் 25 வயதினர் அல்லது அதற்கும் குறைவான வயதினர்.

காமன்வெல்த் உறுப்பு நாடுகளையும் அவை உறுப்பியம் பெற்ற நாளையும் கீழ்க்கண்டப்   பட்டியலில் காணலாம்.

நாடு	உறுப்பியம் பெற்ற நாள்	கண்டம்
அன்டிகுவா & பார்பியூடா	1 நவம்பர் 1981	வட அமெரிக்கா
ஆஸ்திரேலியா	11 டிசம்பர் 1931	ஓசானியா
பகாமாஸ்	10 ஜூலை 1973	வட அமெரிக்கா
பங்களாதேஷ்	18 ஏப்ரல் 1972	ஆசியா
பார்பேடாஸ்	30 நவம்பர் 1966	வட அமெரிக்கா
பெலீஸ்	21 செப்டம்பர் 1981	வட அமெரிக்கா
போட்சுவானா	30 செப்டம்பர் 1966	ஆப்பிரிக்கா
புருணை	1 ஜனவரி 1984	ஆசியா
கமரூன்	13 நவம்பர் 1995	ஆப்பிரிக்கா
கனடா	11 டிசம்பர் 1931	வட அமெரிக்கா
சைப்ரஸ்	13 மார்ச் 1961	ஐரோப்பா
டோமினிக்கா	3 நவம்பர் 1978	வட அமெரிக்கா
பிஜி (Fiji)	10 அக்டோபர் 1970 (2006-ஆம் ஆண்டு பிஜியில் நடந்த இராணுவப் புரட்சி காரணமாக அதே ஆண்டு இந்நாடு இடைநீக்கம் செய்யப்பட்டது)	ஓசானியா
காம்பியா	18 பிப்ரவரி 1965	ஆப்பிரிக்கா
கானா	6 மார்ச் 1957	ஆப்பிரிக்கா
கிரெனேடா	7 பிப்ரவரி 1974	வட அமெரிக்கா
கயானா	26 மே 1966	தென் அமெரிக்கா
இந்தியா	15 ஆகஸ்ட் 1947	ஆசியா
ஜமெய்க்கா	6 ஆகஸ்ட் 1962	வட அமெரிக்கா
கென்யா	12 டிசம்பர் 1963	ஆப்பிரிக்கா
கிரிபாஸ்	12 ஜூலை 1979	ஓசானியா
லெசோத்தோ	4 அக்டோபர் 1966	ஆப்பிரிக்கா
மலாவி	6 ஜூலை 1964	ஆப்பிரிக்கா
மலேசியா	31 ஆகஸ்ட் 1957	ஆசியா